عزيزى محافظ الجيزه.. ممكن تنزل تشوف رعاياك

عزيزى محافظ الجيزه..تحيه طيبه و بعد
انا سمعت انك اتخضيت لما شفت الهرم الرابع
اسمحلى اعزمك على كوبايه شاى عندنا
و اوريك جبال خامس و تلال تانيه
بصراحه انا فاض بيا
لو سيادتك اتفرجت على الصور حتتخض شويه
لو قلتلك ان الصور دى بقالها شهر و ان الزباله
كل يو بتكبر و عدت ارتفاع دور و خرجت للشارع
و جيت شفت بنفسك حتكتئب
تخيل انى باصحى كل يوم على الزباله

كل يوم أنزل الصبح من بيتنا عشان يقابلنى المنظر ده
كل يوم لازم اول ما اوصل للمكان أشمر ايديا و ارفع هدومى و اكتم نفسى
و اطلع اجرى قبل ما تقف عليا حشره و لا تقابلنى جثه حاجه مرميه
اول مره اشوف أبو قردان بيه بجلاله قدره سايب مملكته و جاى ف هجره من جنينته
و معدى نص شارع الهرم و ترسا

اسمحلى اقولك الشارع مليان عربيات زباله
لكن يافرحتى مفيش حد بيشلها
الا العربجيه لو جم يدوروا على أكل و لا حاجه لقطه
و النتيجه بهدلت الدنيا!

اسمحلى كمان اعزمك تزور محطه المجارى اللى على بعد شارع مننا
و الله الحكومه بتتعب و دخلت مجارى بعد خزانات الصرف تحت البيوت
بس مش معقول نفضل نشم ريحتها طول ما المحطه بتشتغل!

عزيزى محافظ الجيزه بلاش تتقل علينا و تعالى الحقنا و النبى

ليه المقلب

لقيت انى من اول ما باصحى كل يوم الصبح
بتأذى عينى حاجات كتير
و بتاذى ودانى اكتر
و للاسف جسمى
و بتجنن اكتر من كل مظاهر الجهل و الغباء و الاهمال حوالينا
سواء منا او من المسئولين عن الحاجات دى
زباله تسريب مياه
سواقين ميكروباسات و الاغانى العجيبه
الافراح
تحرشات
قله ادب كتير من الناس و انعدام النخوه و مساعده الغير
مفيش حاجه اسمها نظام ذوق
التكلف الزايد و التمثيل
استغلال المناصب
مسرحيه كبيره

و لقيتنى باتعلق بصور منها الحلو
و منها السىء اوى
و مش قادره اشيلهم

قلت بدل ما اجننى ما اعمل مقلب
ايوه مقلب
ارمى فيه كل الحاجات المنيله حوالينا
ماتيجى كل واحد فينا ينزل يصور الدنيا و اللى فيها
و كل حاجه مضايقاه يعلى صوته بيها
و ناخد موقف
يمكن صوتنا يوصل لغيرنا
يمكن نقدر نغير